ԱՀԱԸ-ի մամուլի քարտուղար Անդրանիկ Մարդոյանը, շնորհավորելով ներկաներին ԱՀԱԸ-ի 100-ամյակի կապակցությամբ, անդրադարձավ ցուցահանդեսի ստեղծմանը, կազմակերպչական աշխատանքներին, շնորհակալություն հայտնեց ցուցահանդեսի բացմանը ներկա հեղինակներին, կազմակերպիչներին, հատկապես ցուցահանդեսի աշխատանքները համակարգող՝ գեղանկարիչ, երգիծանկարիչ, ռեժիսոր Վրեժ Քասունուն՝ ձևավորման և համակարգման ողջ հոգսն իր վրա վերցնելու համար:
Հատուկ շնորհակալություն հայտնեց Մշակույթի նախարար Լիլիթ Մակունցին Ազգային պատկերասրահի ֆոնդերից Արմիսի՝ Արմեն Միսիրյանի գործերը դուրս բերելու և այստեղ ներկայացնելու թույլտվության համար:
Այնուհետև ելույթ ունեցավ Վրեժ Քասունին: Նա ներկայացրեց ցուցահանդեսի բացմանը ներկա հեղինակներին, հակիրճ բնութագրեց նրանց աշխատանքները և շեշտեց, որ այս գործերը բազմիցս ներկայացվել են նաև այլ երկրներում:
Ելույթ ունեցավ ԱՀԱԸ-ի գործադիր տնօրեն Զավեն Խանջյանը: Պրն Խանջյանը նույնպես շնորհակալություն հայտնեց Հայ Ավետարանական արվեստագետներին իրենց աշխատանքները տրամադրելու համար և ասաց. «Այսօր մենք ականատեսն եք արվեստի յուրահատուկ աշխատանքների ցուցադրության: Ճիշտ է, որ այս գործերը Հայ Ավետարանական արվեստագետների գործեր ենք անվանում, սակայն դրանք չունեն ավետարանական համայնքի պատկանելիություն, դրանք բոլորինն են: Ընտրված 15 արվեստագետները գեղեցիկի ուժով ներկայացնում են մարդկային բնավորությունները, բնության հարուստ նրբերանգները… և ամենակարևորը, որ այս ցուցահանդեսը հնարավորություն է տալիս այցելուներին շփվելու ներկայացված գործերի հեղինակների հետ, որոնք պատրաստակամ են շփվելու ձեզ հետ և ներկայացնելու իրենց կտավները: Վստահ եմ, որ ցուցահանդեսը կարժանանա ինչպես ձեր, այնպես էլ արվեստի քննադատների դրվատական գնահատականներին»:
Այնուհետև արվեստասերները շրջեցին պատկերասրահով, դիտեցին ներկայացված գործերը, շփվեցին հեղինակների հետ:
Ցուցահանդեսը բաց կլինի մինչև հոկտեմբերի 1-ը:
